சானியாவுக்கு பாக்., மந்திரி தங்க கிரீடம் அளித்து வாழ்த்து

கிரிக்கெட் வீரர் சோயப் மாலிக் - டென்னிஸ் வீராங்கனை சானியா மிர்சா திருமண வரவேற்பில், பாகிஸ்தான் அமைச்சர் ஆஷிக் அவான் உள்ளிட்ட பிரமுகர்கள் கலந்து கொண்டு, தங்க கிரீடத்தை அன்பளிப்பாக அளித்துள்ளனர்.பாகிஸ்தான் கிரிக்கெட் வீரர் சோயப் மாலிக் - சானிய மிர்சா திருமணம் கடந்த 12ம் தேதி ஐதராபாத்தில் உள்ள நட்சத்திர ஓட்டலில் எளிமையாக நடந்தது. ஐதராபாத்தில் உள்ள நட்சத்திர ஓட்டலில் நேற்று நடந்த திருமண வரவேற்பில் ஏராளமான வி.ஐ.பி.,க்கள் கலந்து கொண்டனர்.

பாகிஸ்தானிலிருந்து மக்கள் நலத்துறை அமைச்சர் ஆஷிக் அவான், முன்னாள் கிரிக்கெட் வீரர் சோகைல் தன்வீர் உள்ளிட்டவர்கள் சானியா திருமண வரவேற்பில் கலந்து கொண்டனர். பாகிஸ்தான் சார்பில் இவர்கள் சானியாவுக்கு தங்க கிரீடம் அளித்தனர்.பாகிஸ்தான் அமைச்சர் ஆஷிக் அவான் குறிப்பிடுகையில், 'சோயப் - சானியா திருமணம் இந்திய - பாகிஸ்தான் நட்புறவை மேம்படுத்த உதவியுள்ளது' என்றார்.