திருமாவளவனுக்கு டாக்டர் பட்டம்

விடுதலைச் சிறுத்தைகள் கட்சித் தலைவர் தொல்.திருமாவளவனுக்கு வரும் 18.07.2009 அன்று டாக்டர் பட்டம் வழங்கப்படுகிறது.

இதுகுறித்து அக்கட்சியின் தலைமை நிலையச் செயலாளர் வன்னி அரசு வெளியிட்டுள்ள அறிக்கையில்,

விடுதலைச் சிறுத்தைகள் தலைவர் தொல்.திருமாவளவன் கால் நூற்றாண்டுக்கும் மேலாக ஆற்றி வரும் சமூகப் பணியைப் பாராட்டி உலக அளவில் செயல்பட்டுவரும் இறையியல் கல்லூரியான குருகுலம் அகாடமி, டாக்டர் (முனைவர்) பட்டம் வழங்குகிறது.

சமூகப் பணி மற்றும் இறைதொண்டு ஆகியவற்றில் சிறப்பான முறையில் பணியாற்றிய சிந்தனையாளர்கள் மற்றும் களப் போராளிகளுக்கு இக்கல்லூரி கடந்த 20 ஆண்டுகளுக்கும் மேலாக டாக்டர் பட்டம் வழங்கி வருகிறது.

2009ஆம் ஆண்டுக்கான டாக்டர் பட்டத்தை விடுதலைச் சிறுத்தைகள் தலைவர் தொல்.திருமாவளவனுக்கு இக்கல்லூரி வழங்குகிறது.

மிகவும் கீழ்நிலையில் கேட்பாராற்று ஒடுக்குண்டு கிடந்த தலித் மக்களைத் தலைநிமிர வைத்த தொல்.திருமாவளவன் பணியை மேலும் ஊக்கப்படுத்தும் விதமாக இந்த டாக்டர் பட்டத்தை இக்கல்லூரி வழங்குகிறது என்று கூறியுள்ளார்.

மன்மோகனுக்கு செளதி பல்கலை டாக்டர் பட்டம் வழங்கியது

பிரதமர் மன்மோகன் சிங்குக்கு கிங் சாத் பல்கலைக்கழகம் கெளரவ டாக்டர் பட்டம் வழங்கிக் கெளரவித்தது.

ரியாத்தில் உள்ள கிங் சாத் பல்கலைக்கழகத்தில் நடந்த நிகழ்ச்சியில், பிரதமருக்கு இந்தப் பட்டம் வழங்கப்பட்டது.

நிகழ்ச்சியில் மன்மோகன் சிங் பேசுகையில், கல்வித்துறையில் இரு நாடுகளும் மேலும் நெருக்கமான முறையில் செயல்பட வேண்டும்.

இரு நாடுகளுக்கும் இடையிலான கலாச்சாரம் மற்றும் கல்விப் பரிமாற்ற உறவுகள் ஆயிரம் ஆண்டு பழமையானவை.

இது சமீப காலமாக தேய்ந்து போய் விட்டது. இதை மறு சீரமைத்து மறுமலர்ச்சியை ஏற்படுத்த வேண்டியது அவசியம் என்றார்.