சோயப் - சானியா வரவேற்பில் தடபுடல் விருந்து நடக்குமா?

பாகிஸ்தானின் லாகூர் நகரில் நடக்கும் சோயப் - சானியா மிர்சா திருமண வரவேற்பு விருந்தில், தடபுடலாக பல்வேறு வகை உணவுகளை பரிமாறக்கூடாது என்ற மாகாண அரசின் உத்தரவால், பிரச்னை ஏற்பட்டுள்ளது. பாகிஸ்தான் கிரிக்கெட் வீரர் சோயப் மாலிக்குக்கும், டென்னிஸ் வீராங்கனை சானியா மிர்சாவுக்கும் ஐதராபாத்தில் இரண்டு நாட்களுக்கு முன் திருமணம் நடந்தது. இன்று இவர்களது திருமண வரவேற்பு, ஐதராபாத்தில் உள்ள ஐந்து நட்சத்திர ஓட்டலில் நடக்கிறது.

சோயப் மாலிக் வீட்டு சார்பில் பாகிஸ்தானின் லாகூர் நகரில் வரும் 22ம் தேதி, திருமண வரவேற்பு நடைபெற உள்ளது. இதற்காக 500 பேருக்கு விருந்தளிக்க, அங்குள்ள நட்சத்திர ஓட்டலில் ஏற்பாடு செய்யப்பட்டுள்ளது.கோழிக்கறி குழம்பு, குலாப் ஜாமூன், ரசமலாய் ஆகியவை இந்த விருந்தில் பரிமாற திட்டமிடப்பட்டது. ஆனால், பாகிஸ்தானின் பஞ்சாப் மாகாண அரசின் உத்தரவு படி எவ்வளவு பணக்காரர்களாக இருந்தாலும், திருமண விருந்தில் ஒரு சிறப்பு வகை உணவு பதார்த்தத்திற்கு மேல் பரிமாறக்கூடாது என்ற உத்தரவு, அமலில் உள்ளது.

திருமணம் எளிமையாக நடக்க வேண்டும் என்ற நோக்கில் அங்கு இந்த உத்தரவு அமல்படுத்தப் பட்டுள்ளது.'சோயப் - சானியா திருமண வரவேற்பு நிகழ்ச்சி வி.வி.ஐ.பி.,க் கள் சம்பந்தப் பட்டது என்றாலும், பஞ்சாப் மாகாண அரசின் உத்தரவை மீற முடியாது' என, ஓட்டல் நிர்வாகம் திட்டவட்டமாகக் கூறிவிட்டது.

இதனால், சோயப் - சானியா திருமண வரவேற்பில் தடல்புடல் விருந்தை எதிர்பார்க்க முடியாத நிலை ஏற்பட்டுள்ளது. இனி, சோயப்பிற்காக மாகாண அரசு ஏதாவது உத்தரவு புதிதாக போட்டால் தான், நிலைமை மாறும்.
சானியாவின் பெயரைமாற்றிய பெற்றோர்:டென்னிஸ் வீராங்கனை சானியா மீதுள்ள ஆர்வத்தின் காரணமாக, மத்திய பிரதேச மாநிலம் உஜ்ஜைன் பகுதியைச் சேர்ந்த மதன்லால் - கீதா தம்பதியர், கடந்த 2002ம் ஆண்டு பிறந்த தங்கள் குழந்தைக்கு முஸ்லிம் பெயரான சானியா என்று வைத்தனர்.
தற்போது சானியா மிர்சா, பாகிஸ்தானியரை மணந்துள்ளதால் இந்த தம்பதியர் கோபமடைந்துள்ளனர். எனவே, தங்கள் மகளுக்கு வைத்த சானியா பெயரை மாற்றி, 'சங்கீதா' என பதிவு செய்ய விண்ணப்பம் செய்துள்ளனர்.

வெள்ளை மாளிகை விருந்தில் ரஹ்மான்

வெள்ளை மாளிகையில் பிரதமர் மன்மோகன் சிங்கிற்கு அமெரிக்க அதிபர் ஒபாமா அளித்த சிறப்பு இரவு விருந்தில் இந்திய வாசமே தூக்கலாக இருந்தது. மேலும் அனைவரும் வியக்கும் வகையில் மன்மோகன் சிங்கை இந்தியில் வரவேற்று அசத்தினார் ஒபாமா. ஒபாமாக அதிபரான பின்னர் முதல் முறையாக அரசு முறைப் பயணமாக அமெரிக்கா சென்றுள்ளார் பிரதமர் மன்மோகன் சிங். நேற்று ஒபாமாவை அவர் சந்தித்தார். அப்போது பிரதமரைக் கெளரவிக்கும் வகையில் வெள்ளை மாளிகையின் தெற்குப் புல்வெளிப் பகுதியில், பிரமாண்ட விருந்தளித்தார் ஒபாமா. பிரதமர் மன்மோகன் சிங் விருந்துக்கு வந்தபோது ஆப்கா ஸ்வாகத் ஹை என்று இந்தியில் கூறி அசத்தினார் ஒபாமா. பிரதமருடன் 300க்கும் மேற்பட்ட விருந்தினர்கள் இதில் கலந்து கொண்டனர். இந்த விருந்தில் இந்திய வாசம் தூக்கலாக காணப்பட்டது. சாப்பாட்டில் மட்டுமல்லாமல் வந்திருந்த புள்ளிகளும் பெரும்பாலும் இந்தியப் பிரபலங்களாக இருந்தனர். விருந்தில் இடம் பெற்ற காய்கறிகளில் பல அதிபரின் மனைவி மிஷல் ஒபாமாவின் நேரடி மேற்பார்வையில் பராமரிக்கப்பட்டு வரும் வெள்ளை மாளிகை தோட்டத்தில் வளர்ந்தவையாம். விருந்தின் முதல் சுற்றில் உருளைக்கிழங்கு மற்றும் எக்பிளான்ட் (கத்தரிக்காய்) சாலட், ஃபிரஷ் சீஸ் உடன் பருப்பு சூப் ஆகியவை பரிமாறப்பட்டன. அடுத்து, கிரீன் கறி ப்ரான், வறுத்த உருளைக்கிழங்கு, தக்காளி சட்னி, தேங்காயில் ஊறவைத்த பாசுமதி என களை கட்டியது. உணவு விருந்துக்கு பிறகு இசைப் புயல் ஏ.ஆர்.ரஹ்மான் இசை விருந்து அளிக்கப்பட்டது. இதனால் வயிறோடு, இதயமும் நிறைந்தது. ரஹ்மானின் இசையைத் தொடர்ந்து, கிராம்மி விருது வென்றவர்களான ஜெனிஃபர் ஹட்சனின் சொக்க வைக்கும் பாடல்கள் இடம் பெற்றன. கர்ட் எல்லிங்கின் ஜாஸ் இசையும் நிறைவு சேர்த்தது. விருந்தினர்கள் வரிசையில், இந்தியா வின் பவர்ஃபுல் முகங்களோடு, அமெரிக்கா வாழ் இந்தியர்களான பெப்சி தலைமை செயலதிகாரி இந்திரா நூயி, ஆன்மிக ஆலோசகர் தீபிகா சோப்ரா, பிரபல ஹாலிவுட் இயக்குனரும் தமிழருமான (சிக்ஸ்த் சென்ஸ், வில்லேஜ், அன்பிரக்கபிள், சைன்ஸ் உள்ளிட்ட அட்டகாச படங்களை இயக்கியவர்) மனோஜ் நைட் ஷியாமளன் மற்றும் சர்வதேச மீடியா பெரும் புள்ளிகளும் விருந்தி்ல் பங்கேற்றனர். ஹாலிவுட் ஜாம்பாவான்களான ஸ்டீவன் ஸ்பீல்பர்க், டேவிட் ஜெஃபன், ஜெஃப்ரி கெட்சன்பர்க் மற்றும் ஆல்ஃப்ரே உடார்ட், பிளெய்ர் அண்டர்வுட் ஆகியோரும் வந்திருந்தனர். ரஹ்மான் நிகழ்ச்சியை தொடங்கும் முன்பு அவரை மிஷல் அறிமுகப்படுத்தினார். அப்போது மிஷல் கூறுகையில், இவர் ஆஸ்கர் விருது வென்றவர். ஸ்லம்டாக் மில்லியனர் படத்திற்கு இசையமைத்தவர். நீங்கள் எத்தனை பேர் அந்தப் படத்தைப் பார்த்திருப்பீர்கள் என்று எனக்குத் தெரியவில்லை. ஆனால் மிகவும் அற்புதமான படம் என்றார் மிஷல்.

மன்மோகனுக்கு ஒபாமா விருந்து

அமெரிக்க அதிபர் ஒபாமா, பிரதமர் மன்மோகன் சிங்குக்கு அளிக்கும் விருந்தில் 400 பேர் கலந்துகொள்கின்றனர். பிரதமர் மன்மோகன் சிங் அடுத்த வாரம் அமெரிக்கா செல்கிறார். அமெரிக்க அதிபர் ஒபாமா, வெள்ளை மாளிகை வளாகத்தில் வரும் 24ம் தேதி மன்மோகன் சிங்குக்கு சிறப்பு விருந்தளித்து கவுரப்படுத்த உள்ளார்.அமெரிக்க வெளியுறவு அமைச்சர் ஹிலாரி, இந்திய வம்சா வளியினர், லூசியானா கவர்னர் பாபி ஜின்டால் உள்ளிட்ட 120 வி.வி.ஐ.பி.,க்கள் உட்பட 400 பேர் இந்த விருந்தில் கலந்து கொள்கின்றனர்.