ஊழல் இந்தியாவுக்கு 84வது இடம்

டிரான்ஸ்பரன்சி இன்டர்நேஷனல் (டிஐ) என்ற அமைப்பு வெளியிட்டுள்ள ஊழல் மலிந்த நாடுகள் பட்டியலில் இந்தியாவுக்கு 84வது இடம் கிடைத்துள்ளது. மொத்தம் 180 நாடுகள் இந்தப் பட்டியலில் இடம் பெற்றுள்ளன.அரசுத் துறை ஊழலை அடிப்படையாக வைத்து இந்தப் பட்டியலை டிஐ வெளியிட்டுள்ளது.

இந்த அமைப்பு பெர்லினைச் சேர்ந்ததாகும். சுவிட்சர்லாந்து, லிச்டென்ஸ்டெயின் ஆகிய நாடுகளில் உள்ளதைப் போன்ற வரி சலுகைகளை இந்திய வங்கிகளிலும் அமல்படுத்தினால் பெருமளவிலான கள்ளப் பணப் புழக்கத்தை தடுக்க முடியும் எனவும் இது ஆலோசனை கூறியுள்ளது.இதுகுறித்து இந்த அமைப்பின் தலைவர் ஹியூகட் லாபெல் கூறுகையில், ஊழல் பணம் பாதுகாக்கப்படக் கூடாது. அதற்கு எங்குமே புகலிடம் இருக்கக் கூடாது.

வங்கி சட்டங்களில் பெருமளவில் சீர்திருத்தங்களைக் கொண்டு வர வேண்டிய நேரம் இது என்றார் அவர்.மிகப் பெரிய அளவில் ஊழல் மலிந்து கிடக்கும் நாடுகளாக சோமாலியா, ஆப்கானிஸ்தான், மியான்மர், சூடான், ஈராக் ஆகியவை உள்ளன. நியூசிலாந்து, டென்மார்க், சிங்கப்பூர் ஆகியவை ஊழலற்ற நாடுகள் வரிசையில் முதல் பத்து இடங்களுக்குள் உள்ளன.இந்தியாவில் கடந்த ஐந்து ஆண்டுகளில் நிலைமை மோசமாகியுள்ளதாம். கடந்த 2004வது ஆண்டில், 146 நாடுகளில் 90வது இடத்தில் இருந்தது என்பது குறிப்பிடத்தக்கது.

இந்த ஆண்டு பட்டியலில் இந்தியாவை விட நல்ல இடத்திற்கு செர்பியா (83), பர்கினோ புசோ (79), பெரு (75), காணா (69) ஆகிய நாடுககள் உள்ளன. 'நண்பர்' பாகிஸ்தான் 139வது இடத்தில் உள்ளார். இன்னொரு நண்பரான வங்கதேசமும், இதே இடத்தில்தான் உள்ளது. இலங்கைக்கு 97வது இடம். பூடான் 49வது ரேங்க்கைப் பெற்றுள்ளது.

மாயாவதி மனு தள்ளுபடி

உலக அதிசயங்களில் ஒன்றான தாஜ்மகாலை மறைக்கும் வகையில், 'தாஜ் ஓட்டல்' கட்ட உத்தர பிரதேச முதல்வர் மாயாவதி அனுமதி அளித்தார். அதில் கோடிக்கணக்கில் ஊழல் நடந்ததாக கூறப்படுகிறது. எனவே, மாயாவதி மீது சி.பி.ஐ. விசாரணை நடத்த அனுமதி அளிக்குமாறு கவர்னரிடம் கோரிக்கை விடுக்கப்பட்டது. அந்த கோரிக்கையை கவர்னர் ராஜேஸ்வர் ஏற்கவில்லை.

எனவே, மாயாவதி மீது சி.பி.ஐ. விசாரணை கேட்டு அலகாபாத் ஐகோர்ட்டில் கமலேஷ் வர்மா என்பவர் வழக்கு தொடர்ந்தார். இதையடுத்து, உத்தர பிரதேசத்தில் என்னுடைய ஆட்சியை கலைக்க எதிர்க்கட்சியினர் சதி செய்துள்ளனர். எனவே, அந்த பொதுநல மனுவில் இருந்து என்னை விடுவிக்க வேண்டும் என சுப்ரீம் கோர்ட்டில் மாயாவதி மனு தாக்கல் செய்தார். அதை விசாரித்த நீதிபதிகள் சிர்புர்கர், சுதர்சன் ரெட்டி ஆகியோர் அடங்கி பெஞ்சு, மனுவை தள்ளுபடி செய்தது.

நீதிபதிகள் தீர்ப்பில் கூறும்போது, "இந்த பிரச்சினையில் அலகாபாத் ஐகோர்ட்டையே மனுதாரர் (மாயாவதி) அணுக வேண்டும். ஆட்சியை கலைப்பதற்காக எதிர்க்கட்சிகள் கோரிக்கை விடுப்பது குறித்து எங்களுக்கு கவலை கிடையாது. மனுவில் உள்ள விவகாரத்தை மட்டும் பேசாமல் மற்ற அனைத்து விஷயங்களையும் ஏன் பேச வேண்டும்'' என்று தெரிவித்துள்ளனர்.

ஊழல் பணத்தில் 2 சரக்கு கப்பல்

ராஞ்சி: ஜார்க்கண்ட் மாநில முன்னாள் முதல்வர் மதுகோடா முதல்வராக இருந்த போது முறைகேடாக சேர்த்த பணத்தில் 2 சரக்குக் கப்பல்களை வாங்கியிருப்பது தற்போது வெளிச்சத்திற்கு வந்துள்ளது.

மதுகோடா சுமார் 4 ஆயிரத்து 500 கோடி ரூபாய்க்கு மேல் சொத்து குவித்து இருப்பதை வருமான வரி மற்றும் அமலாக்க பிரிவு அதிகாரிகள் கண்டுபிடித்தனர். இதுதொடர்பாக அதிகாரிகள் அவரிடம் தொடர்ந்து விசாரித்து வருகின்றனர்.

வாங்கி குவித்த சொத்துக்கள் குறித்து தகவல்களை திரட்டி வருகின்றனர்.ஆனால் மதுகோடாவோ தாம் ஊழல் எதுவும் செய்யவில்லை. பழங்குடியினர் என்பதால் தன்ன அரசியல்ரீதியாக வீழ்த்த தன் மீது ஊழல் குற்றச்சாற்றை சுமத்துவதாக கூறியுள்ளார்.

ஆனால் அவர் செய்த ஊழல் பட்டியல் தொடர்ந்து நீண்டு கொண்டே இருக்கிறது. அவர் 2 சரக்கு கப்பல்களை வாங்கி இருப்பதை வருமான வரித்துறையினர் கண்டுபிடித்து உள்ளனர். மும்பையில் செயல்படும் “திரவீன் மேரிடைம் இந்தியன் லிமிடெட்” என்ற கப்பல் நிறுவனத்துடன் சேர்ந்து இந்த கப்பல்களை வாங்கி உள்ளார்.

அவரது கூட்டாளிகள் மனோஜ், அரவிந்த் வியாஸ் ஆகியோர் பெயரில் இந்த கப்பல்கள் வாங்கப்பட்டு உள்ளன.கப்பல் வாங்க செலவழிக்கப்பட்ட பணம் எவ்வளவு? இதற்கான பணப் பரிமாற்றம் எப்படி நடந்துள்ளது? போன்ற தகவல்களை திரட்டி வருவதாக வருமான வரி அதிகாரிகள் தெரிவித்தனர்.ஜார்க்கண்ட் மாநிலத்தில் அரசு நிறுவனங்களுக்கு ஒதுக்கப்பட்ட இரும்புத் தாதுவை தனியார் நிறுவனங்களுக்கு விற்று முறைகேடு செய்ததிலும் மதுகோடா நிறுவனம் சம்பந்தப்பட்டு உள்ளது.

வருமான வரித்துறை அதிகாரிகள் இப்போது கண்டுபிடித்து உள்ளனர்.இதில் எத்தனை கோடி ரூபாய் ஊழல் நடந்தது என்றும் அதிகாரிகள் விசாரணை நடத்தி வருகிறார்கள்.