இதற்கு முன் முதல்வராக இருந்தவரை, அவ்வளவு எளிதில் யாரும் பார்க்க முடியாது. இப்போதைய முதல்வரையும், துணை முதல்வரையும், அதிகாரிகளையும் தொழிலதிபர்கள் எளிதில், எப்போது வேண்டுமானாலும் சந்திக்கின்ற நிலை இருக்கிறது. அவர்களது குறைகளை தெரிவிக்கின்றனர். அதனால், தொழில்துறை வளர்ச்சி பெறுகிறது.
கடந்த ஆட்சியில் பட்ஜெட் வருகிறது என்றால், என்ன அறிவிப்பு வருமோ என்ற நிலை இருந்தது. ஆனால், இந்த ஆட்சியில் பட்ஜெட்டுக்கு முன்னதாக அனைத்து தரப்பினரையும் அழைத்துப்பேசி, நல்ல பட்ஜெட்டை அன்பழகன் தாக்கல் செய்திருக்கிறார். மூவலூர் ராமாமிர்தம் திருமண உதவி திட்டத்தை, முந்தைய ஆட்சி முடக்கி வைத்திருந்தது. ஆனால், இந்த ஆட்சி வந்ததும் அத்திட்டத்தின் கீழ் ஏராளமான பெண்களுக்கு திருமண நிதி உதவி வழங்கப்படுகிறது. இவ்வாறு அனிதா ராதாகிருஷ்ணன் பேசினார்.
